ਮਾਨਸਾ, 29 ਸਤੰਬਰ:- (ਸਾਰਾ ਯਹਾਂ/ਗੁਰਪ੍ਰੀਤ ਧਾਲੀਵਾਲ) : ਰੋਟਰੀ ਕਲੱਬ ਮਾਨਸਾ ਵੱਲੋਂ ਵਿਸ਼ਵ ਦਿਲ ਦਿਵਸ ਦੇ ਮੌਕੇ ਮਨੁੱਖੀ ਭਲਾਈ ਅਤੇ ਸਮਾਜਿਕ ਸੇਵਾ ਪ੍ਰਤੀ ਆਪਣੀ ਦ੍ਰਿੜ ਵਚਨਬੱਧਤਾ ਦੇ ਤਹਿਤ ਇੱਕ ਵਿਸ਼ਾਲ ਦਿਲ ਦੀ ਜਾਂਚ ਮੈਗਾ ਕੈਂਪ ਦਾ ਸਫਲ ਆਯੋਜਨ ਕੀਤਾ ਗਿਆ। ਇਹ ਕੈਂਪ ਮਾਨਸਾ ਕਲੱਬ ਵਿਖੇ ਡਾ. ਵਿਵੇਕ ਹਾਰਟ ਐਂਡ ਮਲਟੀ-ਸਪੈਸ਼ਲਿਟੀ ਹਸਪਤਾਲ ਦੇ ਸਹਿਯੋਗ ਨਾਲ ਕਰਵਾਇਆ ਗਿਆ, ਜਿਸ ਵਿੱਚ 150 ਤੋਂ ਵੱਧ ਲੋਗਾਂ ਨੇ ਲਾਭ ਪ੍ਰਾਪਤ ਕੀਤਾ।
ਡਾ. ਵਿਵੇਕ ਜਿੰਦਲ ਅਤੇ ਉਨ੍ਹਾਂ ਦੀ ਤਜਰਬੇਕਾਰ ਡਾਕਟਰੀ ਟੀਮ ਵੱਲੋਂ ਕੈਂਪ ਦੌਰਾਨ ਮਰੀਜ਼ਾਂ ਨੂੰ ਮੁਫ਼ਤ ਸਲਾਹ-ਮਸ਼ਵਰੇ ਦੇਣ ਦੇ ਨਾਲ-ਨਾਲ ਈ.ਸੀ.ਜੀ., HbA1c (ਸ਼ੂਗਰ ਜਾਂਚ), ਅਤੇ ਸਪਾਈਰੋਮੈਟਰੀ (ਫੇਫੜਿਆਂ ਦੀ ਜਾਂਚ) ਵਰਗੇ ਮਹੱਤਵਪੂਰਨ ਟੈਸਟ ਵੀ ਮੁਫ਼ਤ ਕੀਤੇ ਗਏ। ਇਨ੍ਹਾਂ ਦੇ ਇਲਾਵਾ ਹਰ ਮਰੀਜ਼ ਨੂੰ ਮੁਫ਼ਤ ਦਵਾਈਆਂ ਵੀ ਪ੍ਰਦਾਨ ਕੀਤੀਆਂ ਗਈਆਂ। ਇਹ ਸਾਰੀਆਂ ਸੇਵਾਵਾਂ ਕਿਸੇ ਵੀ ਪ੍ਰਕਾਰ ਦੇ ਸ਼ੁਲਕ ਤੋਂ ਰਹਿਤ ਰੱਖੀਆਂ ਗਈਆਂ, ਜੋ ਰੋਟਰੀ ਦੀ ਨਿਸ਼ਕਾਮ ਸੇਵਾ ਦੀ ਭਾਵਨਾ ਨੂੰ ਦਰਸਾਉਂਦੀਆਂ ਹਨ।
ਰੋਟਰੀ ਕਲੱਬ ਮਾਨਸਾ ਦੇ ਪ੍ਰਧਾਨ ਅੰਕੁਰ ਸਿੰਗਲਾ ਨੇ ਕਿਹਾ ਕਿ ਰੋਟਰੀ ਹਮੇਸ਼ਾਂ ਲੋਕ ਸੇਵਾ ਲਈ ਸਮਰਪਿਤ ਰਹੀ ਹੈ। ਉਨ੍ਹਾਂ ਆਖਿਆ ਕਿ ਅਜਿਹੇ ਕੈਂਪ ਰਾਹੀਂ ਅਸੀਂ ਉਹਨਾਂ ਲੋਕਾਂ ਤੱਕ ਜ਼ਰੂਰੀ ਸਿਹਤ ਸੇਵਾਵਾਂ ਪਹੁੰਚਾਉਂਦੇ ਹਾਂ ਜੋ ਵਧੇਰੇ ਖ਼ਰਚ ਵਾਲੀਆਂ ਸਿਹਤ ਸਹੂਲਤਾਂ ਤੋਂ ਵਾਂਝੇ ਰਹਿ ਜਾਂਦੇ ਹਨ। ਕੈਂਪ ਦੀ ਯੋਜਨਾ, ਰਜਿਸਟ੍ਰੇਸ਼ਨ ਅਤੇ ਸੁਚਾਰੂ ਸੰਚਾਲਨ ਦੀ ਜ਼ਿੰਮੇਵਾਰੀ ਪ੍ਰੋਜੈਕਟ ਚੇਅਰਮੈਨ ਜਤਿੰਦਰਵੀਰ ਗੁਪਤਾ ਵੱਲੋਂ ਬਖੂਬੀ ਨਿਭਾਈ ਗਈ।
ਇਸ ਸਮਾਗਮ ਦੀ ਸ਼ੁਰੂਆਤ ਮੁੱਖ ਮਹਿਮਾਨ ਵਜੋਂ ਪਹੁੰਚੇ ਵਿਧਾਇਕ ਡਾ. ਵਿਜੇ ਸਿੰਗਲਾ ਜੀ ਨੇ ਕੀਤੀ, ਜੋ ਖੁਦ ਵੀ ਰੋਟਰੀਅਨ ਹਨ। ਉਨ੍ਹਾਂ ਵੱਲੋਂ ਡਾ. ਵਿਵੇਕ ਜਿੰਦਲ ਨੂੰ ਰੋਟਰੀ ਕਲੱਬ ਮਾਨਸਾ ਦਾ ਨਵਾਂ ਮੈਂਬਰ ਬਣਾਉਂਦਿਆਂ ਰੋਟਰੀ ਪਿੰਨ ਲਗਾ ਕੇ ਸਨਮਾਨਤ ਕੀਤਾ ਗਿਆ। ਇਹ ਸਿਰਫ਼ ਰਵਾਇਤੀ ਰਸਮ ਨਹੀਂ ਸੀ, ਸਗੋਂ ਰੋਟਰੀ ਪਰਿਵਾਰ ਵਿੱਚ ਇੱਕ ਨਵੇਂ ਸੇਵਕ ਦੀ ਭਾਵਪੂਰਕ ਸ਼ੁਰੂਆਤ ਸੀ।
ਕੈਂਪ ਦੇ ਸਮਾਪਨ ਮੌਕੇ ਡਾ. ਵਿਵੇਕ ਜਿੰਦਲ ਵੱਲੋਂ ਸਮਾਜ ਦੀ ਭਲਾਈ ਲਈ ਇੱਕ ਵਿਸ਼ੇਸ਼ ਐਲਾਨ ਵੀ ਕੀਤਾ ਗਿਆ। ਉਨ੍ਹਾਂ ਨੇ ਕਿਹਾ ਕਿ ਰੋਟਰੀਅਨਾਂ ਅਤੇ ਕੈਂਪ ਵਿੱਚ ਸ਼ਾਮਲ ਹੋਏ ਹਰੇਕ ਵਿਅਕਤੀ ਲਈ ਈਕੋ, ਟੀ.ਐੱਮ.ਟੀ. (ਟ੍ਰੈਡਮਿਲ ਟੈਸਟ) ਅਤੇ ਐਂਜੀਓਗ੍ਰਾਫੀ ਵਰਗੇ ਮੁੱਖ ਜਾਂਚ ਟੈਸਟਾਂ ਉੱਤੇ 25% ਛੂਟ ਉਪਲਬਧ ਕਰਵਾਈ ਜਾਵੇਗੀ।
ਇਸ ਮੌਕੇ ਕਈ ਮਾਣਯੋਗ ਅਤਿਥੀਆਂ ਨੇ ਆਪਣੀ ਹਾਜ਼ਰੀ ਨਾਲ ਸਮਾਗਮ ਦੀ ਸ਼ੋਭਾ ਵਧਾਈ। ਇਨ੍ਹਾਂ ਵਿੱਚ ਅਸ਼ੋਕ ਕੁਮਾਰ (ਪ੍ਰਧਾਨ, ਮਾਨਸਾ ਕਲੱਬ) ਅਤੇ ਉਨ੍ਹਾਂ ਦੀ ਟੀਮ, ਰਿੰਪਲ ਮੋਂਗਾ (ਪ੍ਰਿੰਸੀਪਲ, ਗਾਂਧੀ ਸਕੂਲ), ਕੇ.ਬੀ. ਜਿੰਦਲ (ਅਸਿਸਟੈਂਟ ਗਵਰਨਰ, ਰੋਟਰੀ), ਰੋਹਿਤ ਬਾਂਸਲ, ਵਿਨੈ ਮਿੱਤਲ, ਮਨਮੋਹਿਤ ਗੋਇਲ, ਭੂਪੇਸ਼ ਸਿੰਗਲਾ, ਨੈਬ ਸਿੰਘ, ਦੀਪਾਂਸ਼ੂ ਗਰਗ ਅਤੇ ਸੰਦੀਪ ਸਿੰਗਲਾ ਆਦਿ ਸ਼ਾਮਲ ਰਹੇ।
