(ਸਾਰਾ ਯਹਾਂ/ਬਿਊਰੋ ਨਿਊਜ਼) ਜੰਮੂ-ਕਸ਼ਮੀਰ ਦੇ ਪਹਿਲਗਾਮ ਵਿੱਚ ਹੋਏ ਅੱਤਵਾਦੀ ਹਮਲੇ ਨੂੰ ਲੈਕੇ ਪੁਲਿਸ ਨੇ ਇੱਕ ਵੱਡਾ ਖੁਲਾਸਾ ਕਰਦਿਆਂ ਕਿਹਾ ਕਿ ਸ਼ੁਰੂਆਤੀ ਜਾਂਚ ਵਿੱਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਅੱਤਵਾਦੀਆਂ ਦਾ ਇਹ ਗਰੁੱਪ ਹਮਲੇ ਤੋਂ ਇੱਕ ਹਫ਼ਤਾ ਪਹਿਲਾਂ ਪਹਿਲਗਾਮ ਪਹੁੰਚਿਆ ਸੀ ਅਤੇ OGW ਨਾਲ ਉੱਥੇ ਕਈ ਸੰਭਾਵੀ ਨਿਸ਼ਾਨਿਆਂ ਦੀ ਰੇਕੀ ਕੀਤੀ ਸੀ। ਸੂਤਰਾਂ ਅਨੁਸਾਰ, ਚਾਰ ਪਾਕਿਸਤਾਨੀ ਅੱਤਵਾਦੀ ਅਤੇ ਉਨ੍ਹਾਂ ਦੇ ਸਾਥੀ 15 ਅਪ੍ਰੈਲ ਨੂੰ ਪਹਿਲਗਾਮ ਪਹੁੰਚੇ ਅਤੇ ਕਈ ਥਾਵਾਂ ਦੀ ਰੇਕੀ ਕਰਕੇ ਹਮਲੇ ਦਾ ਪਲਾਨ ਬਣਾਇਆ ਸੀ।
ਸਭ ਤੋਂ ਪਹਿਲਾਂ, ਪਹਿਲਗਾਮ ਦੀ ਅਰੂ ਘਾਟੀ ਦੀ ਰੇਕੀ ਕੀਤੀ ਗਈ ਸੀ ਪਰ ਉੱਥੇ ਸੁਰੱਖਿਆ ਬਲਾਂ ਦੇ ਕੈਂਪ ਦੀ ਮੌਜੂਦਗੀ ਕਰਕੇ ਇਸਨੂੰ ਕੈਂਸਲ ਕਰ ਦਿੱਤਾ ਗਿਆ ਸੀ। ਇਸ ਤੋਂ ਬਾਅਦ, ਅਰੂ ਵੱਲ ਜਾਣ ਵਾਲੀ ਸੜਕ ‘ਤੇ ਸਥਿਤ ਮਨੋਰੰਜਨ ਪਾਰਕ ਦੀ ਰੇਕੀ ਕੀਤੀ ਗਈ ਪਰ ਉੱਥੇ ਭੀੜ ਘੱਟ ਹੋਣ ਕਰਕੇ ਇਸ ਨੂੰ ਵੀ ਕੈਂਸਲ ਕਰ ਦਿੱਤਾ ਗਿਆ। ਫਿਰ ਅਖੀਰ ਵਿੱਚ ਬੇਤਾਬ ਵੈਲੀ ਨੂੰ ਚੁਣਿਆ ਗਿਆ, ਜੋ ਕਿ ਅਮਰਨਾਥ ਯਾਤਰਾ ਦੇ ਰੂਟ ‘ਤੇ ਪੈਂਦਾ ਹੈ ਅਤੇ ਉੱਥੇ ਵੀ ਬਹੁਤ ਭੀੜ ਸੀ ਪਰ ਯਾਤਰਾ ਕਾਰਨ ਇਲਾਕੇ ਵਿੱਚ ਸੁਰੱਖਿਆ ਬਲਾਂ ਦੀ ਮੌਜੂਦਗੀ ਕਾਰਨ, ਪਾਕਿਸਤਾਨੀ ਅੱਤਵਾਦੀਆਂ ਨੇ ਇਸ ਤੋਂ ਵੀ ਮਨ੍ਹਾ ਕਰ ਦਿੱਤਾ ਪਰ ਇਹ OGW ਨੂੰ ਨਹੀਂ ਦੱਸਿਆ ਗਿਆ।
ਹਮਲੇ ਤੋਂ ਤਿੰਨ ਦਿਨ ਪਹਿਲਾਂ ਬੈਸਰਨ ਘਾਟੀ ਦੀ ਕੀਤੀ ਰੇਕੀ
ਇਸ ਤੋਂ ਬਾਅਦ, ਹਮਲੇ ਤੋਂ ਤਿੰਨ ਦਿਨ ਪਹਿਲਾਂ, ਪਾਕਿਸਤਾਨੀ ਅੱਤਵਾਦੀ ਬੈਸਰਨ ਘਾਟੀ ਗਏ ਅਤੇ ਤੁਰੰਤ ਇਸਨੂੰ ਚੁਣਿਆ। ਘਟਨਾ ਤੋਂ ਇੱਕ ਦਿਨ ਪਹਿਲਾਂ, ਸਥਾਨਕ OGWs ਨੂੰ 22 ਅਪ੍ਰੈਲ ਨੂੰ ਦੁਪਹਿਰ 2 ਵਜੇ ਤੱਕ ਬੈਸਰਨ ਘਾਟੀ ਪਹੁੰਚਣ ਲਈ ਕਿਹਾ ਗਿਆ ਸੀ। ਜਿਸ ਤੋਂ ਬਾਅਦ, ਸਵੇਰੇ 2:28 ਵਜੇ, ਕਤਲੇਆਮ ਵਿੱਚ ਪਹਿਲੀ ਗੋਲੀ ਚਲਾਈ ਗਈ।
ਸੁਰੱਖਿਆ ਬਲਾਂ ਦਾ ਅੱਤਵਾਦੀਆਂ ਨਾਲ ਹੋ ਚੁੱਕਿਆ ਦੋ ਵਾਰ ਸਾਹਮਣਾ
ਹਮਲੇ ਤੋਂ ਬਾਅਦ ਹੁਣ ਤੱਕ ਕੀਤੇ ਗਏ ਸਰਚ ਆਪ੍ਰੇਸ਼ਨ ਵਿੱਚ, ਸੁਰੱਖਿਆ ਬਲ ਦੋ ਵਾਰ ਅੱਤਵਾਦੀਆਂ ਨਾਲ ਆਹਮੋ-ਸਾਹਮਣੇ ਹੋ ਚੁੱਕੇ ਹਨ। ਇਹਨਾਂ ਨੂੰ ਕੋਕਰਨਾਗ ਅਤੇ ਦੁਰੂ ਦੇ ਜੰਗਲਾਂ ਵਿੱਚ ਦੇਖਿਆ ਗਿਆ ਹੈ। ਸੁਰੱਖਿਆ ਬਲਾਂ ਨੇ ਜੰਗਲ ਦੇ ਇੱਕ ਵੱਡੇ ਹਿੱਸੇ ਨੂੰ ਅੱਗ ਵੀ ਲਗਾ ਦਿੱਤੀ ਪਰ ਅੱਤਵਾਦੀ ਬਾਹਰ ਨਹੀਂ ਆਏ। ਇਸ ਸਭ ਦੇ ਵਿਚਕਾਰ ਸਭ ਤੋਂ ਹੈਰਾਨ ਕਰਨ ਵਾਲੀ ਗੱਲ ਇਹ ਸੀ ਕਿ ਹੁਣ ਤੱਕ ਸਰਚ ਆਪ੍ਰੇਸ਼ਨ ਦੌਰਾਨ ਸਿਰਫ਼ ਦੋ ਅੱਤਵਾਦੀ ਹੀ ਦੇਖੇ ਗਏ ਹਨ।
