ਮਾਨਸਾ (ਸਾਰਾ ਯਹਾਂ/ਮੁੱਖ ਸੰਪਾਦਕ) : ਅੱਜ ਮਾਨਸਾ ਰੇਲਵੇ ਸਟੇਸ਼ਨ ਦੀ ਨਵੀਂ ਇਮਾਰਤ ਦਾ ਚਾਰਜ ਬਿਲਡਿੰਗ ਦੀ ਪੂਰੀ ਸਫਾਈ ਦਾ ਠੇਕਾ ਹੋਣ ਤੋਂ ਬਾਅਦ ਸ਼੍ਰੀ ਪ੍ਰਥਵੀਰਾਜ ਮੀਨਾ ਜੀ ਨੇ ਆਪਣੇ ਪਰਿਵਾਰ ਸਮੇਤ ਸੰਭਾਲਿਆ। ਇਸ ਸ਼ੁਭ ਮੌਕੇ ’ਤੇ ਸਟੇਸ਼ਨ ਦੇ ਸਾਰੇ ਮੁਲਾਜ਼ਮਾਂ ਅਤੇ ਅਧਿਕਾਰੀਆਂ ਵੱਲੋਂ ਸ਼੍ਰੀ ਪ੍ਰਥਵੀਰਾਜ ਮੀਨਾ ਜੀ, ਸ਼੍ਰੀ ਮਹੇਸ਼ ਜੀ ਆਪਣੀ-ਆਪਣੀ ਪਤਨੀ ਸਮੇਤ ਅਤੇ ਸਹਾਇਕ ਸਟੇਸ਼ਨ ਮਾਸਟਰ ਕੁਲਦੀਪ ਸਿੰਘ ਯਾਦਵ ਦੀ ਮੌਜੂਦਗੀ ਵਿੱਚ ਹਵਨ ਕਰਵਾਇਆ ਗਿਆ।
ਹਵਨ ਸਮਾਗਮ ਵਿੱਚ ਮਾਨਸਾ ਡਿਵੈਲਪਮੈਂਟ ਐਸੋਸੀਏਸ਼ਨ ਦੇ ਪ੍ਰਧਾਨ ਸ਼੍ਰੀ ਜਤਿੰਦਰ ਅਗਰਾ, ਸਕੱਤਰ ਸ਼੍ਰੀ ਪ੍ਰੇਮ ਅਗਰਵਾਲ, ਕੈਸ਼ੀਅਰ ਸ਼੍ਰੀ ਕਿਰਸ਼ਨ ਚੁੱਗ ਅਤੇ ਭਾਜਪਾ ਦੇ ਵਾਈਸ ਪ੍ਰਧਾਨ ਸ਼੍ਰੀ ਵਿਨੋਦ ਕੁਮਾਰ ਜੀ ਨੇ ਵਿਸ਼ੇਸ਼ ਤੌਰ ’ਤੇ ਸ਼ਮੂਲੀਅਤ ਕੀਤੀ। ਇਸ ਮੌਕੇ ਸਟੇਸ਼ਨ ਦੀ ਦੂਜੀ ਐਂਟਰੀ, ਨਵੇਂ ਫੁੱਟ ਓਵਰ ਬ੍ਰਿਜ (FOB) ਦੇ ਵਿਸਥਾਰ ਅਤੇ ਸਟੇਸ਼ਨ ਦੇ ਸਮੁੱਚੇ ਵਿਕਾਸ ਲਈ ਕਾਮਨਾ ਕੀਤੀ ਗਈ।
ਨਵੀਂ ਬਿਲਡਿੰਗ ਸ਼ੁਰੂ ਹੋਣ ਨਾਲ ਹੁਣ ਯਾਤਰੀਆਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਪ੍ਰੇਸ਼ਾਨੀ ਨਹੀਂ ਆਵੇਗੀ। ਨਵੀਂ ਇਮਾਰਤ ਵਿੱਚ ਟਾਇਲਟ ਅਤੇ ਬਾਥਰੂਮ ਚਾਲੂ ਹੋ ਜਾਣਗੇ। ਇਸਦੇ ਨਾਲ ਹੀ ਯਾਤਰੀਆਂ ਦੀ ਸੁਵਿਧਾ ਲਈ ਰਿਟਾਇਰਿੰਗ ਰੂਮ ਵੀ ਖੁਲ ਜਾਣਗੇ, ਜਿੱਥੇ ਯਾਤਰੀ ਆਪਣੀ ਟ੍ਰੇਨ ਦੀ ਉਡੀਕ ਆਰਾਮ ਨਾਲ ਕਰ ਸਕਣਗੇ।
ਇਸ ਮੌਕੇ ’ਤੇ ਸ਼੍ਰੀ ਸ਼ਾਮ ਲਾਲ ਜੀ (ਪ੍ਰਧਾਨ, ਸਿਟੀ ਕਲੱਬ), ਸ਼੍ਰੀ ਤਰਸੇਮ ਗੋਇਲ ‘ਜੋਗਾ’ (ਪ੍ਰਧਾਨ, ਸਹਾਰਾ ਕਲੱਬ, ਮਾਨਸਾ), ਸ਼੍ਰੀ ਸੁਨੀਲ ਗੋਇਲ (ਪ੍ਰਧਾਨ, ਸੇਵਾ ਭਾਰਤੀ), ਸ਼੍ਰੀ ਜਗਤਪਾਲ ਸ਼ਰਮਾ ਅਤੇ ਸੀਨੀਅਰ ਸਿਟੀ ਕੌਂਸਲਰ ਵੀ ਹਾਜ਼ਰ ਸਨ। ਭਾਜਪਾ ਦੇ ਸੀਨੀਅਰ ਨੇਤਾ ਸ਼੍ਰੀ ਸੂਰਜ ਚਾਬਰਾ ਜੀ ਨੇ ਵੀ ਸਮਾਗਮ ਵਿੱਚ ਸ਼ਿਰਕਤ ਕਰਦਿਆਂ ਸ਼੍ਰੀ ਪ੍ਰਥਵੀਰਾਜ ਮੀਨਾ ਜੀ ਨੂੰ ਨਵੀਂ ਜ਼ਿੰਮੇਵਾਰੀ ਸੰਭਾਲਣ ’ਤੇ ਵਧਾਈ ਦਿੱਤੀ।
ਹਵਨ ਉਪਰਾਂਤ ਸਟੇਸ਼ਨ ਦੇ ਸਾਰੇ ਸਟਾਫ਼ ਵੱਲੋਂ ਭੰਡਾਰੇ ਦਾ ਆਯੋਜਨ ਕੀਤਾ ਗਿਆ। ਇਸ ਭੰਡਾਰੇ ਵਿੱਚ ਸਟੇਸ਼ਨ ’ਤੇ ਪੀਣ ਵਾਲੇ ਪਾਣੀ ਦੀ ਸੇਵਾ ਕਰਨ ਵਾਲੀ ਵਾਟਰ ਕਮੇਟੀ ਦੇ ਪ੍ਰਧਾਨ ਸ਼੍ਰੀ ਹੁਕਮ ਚੰਦ ਜੀ ਅਤੇ ਸ਼੍ਰੀ ਪ੍ਰੇਮ ਕੁਮਾਰ ਆਪਣੀ ਪੂਰੀ ਟੀਮ ਸਮੇਤ ਸ਼ਾਮਲ ਹੋਏ
