ਚੰਡੀਗੜ੍ਹ (ਸਾਰਾ ਯਹਾ) : ਆਲਮੀ ਪੰਜਾਬੀ ਅਦਬ ਫਾਊਂਡੇਸ਼ਨ ਨੇ ਬਾਬਾ ਫਰੀਦ ਸਾਹਿਤ ਸਨਮਾਨ-2018 ਦਾ ਐਲਾਨ ਕੀਤਾ। ਫਾਊਂਡੇਸ਼ਨ ਦੇ ਪ੍ਰਧਾਨ ਕੰਵਰਜੀਤ ਸਿੰਘ ਸਿੱਧੂ ਨੇ ਦੱਸਿਆ ਕਿ ਇਹ ਸਨਮਾਨ ਮਨਮੋਹਨ ਸਿੰਘ ਦਾਊਂ ਦੀ ਕਿਤਾਬ ‘ਪੰਛੀ ਬਿਰਖ ਸੁਹਾਵੜਾ’ ਨੂੰ ਦਿੱਤਾ ਜਾਏਗਾ। ਇਸ ਸਨਮਾਨ ਵਿੱਚ 51 ਹਜ਼ਾਰ ਰੁਪਏ ਦਾ ਚੈੱਕ ਤੇ ਸਨਮਾਨ ਚਿੰਨ੍ਹ ਸ਼ਾਮਲ ਹੈ।
ਬਾਬਾ ਫਰੀਦ ਸਾਹਿਤ ਸਨਮਾਨ-2018 ਲਈ ਸਾਲ 2016 ਤੇ 2017 ਦੌਰਾਨ ਛਪੀਆਂ ਕਿਤਾਬਾਂ ਭੇਜਣ ਦੀ ਮੰਗ ਕੀਤੀ ਗਈ ਸੀ। 15 ਅਪ੍ਰੈਲ, 2018 ਤਕ ਪ੍ਰਾਪਤ ਹੋਈਆਂ ਕਿਤਾਬਾਂ ਦੀ ਪੜਚੋਲ ਕਰਨ ਤੋਂ ਬਾਅਦ ਅੱਜ ਇਸ ਸਨਮਾਨ ਦਾ ਐਲਾਨ ਕੀਤਾ ਗਿਆ ਹੈ। ਬਾਬਾ ਫਰੀਦ ਸਾਹਿਤ ਸਨਮਾਨ-2018 ਦੇ ਨਾਲ-ਨਾਲ ਪ੍ਰਾਪਤ ਕਿਤਾਬਾਂ ਵਿੱਚੋਂ ਦੋ ਵਿਦਿਆਰਥੀਆਂ ਦੀਆਂ ਕਿਤਾਬਾਂ ‘ਸ਼ਬਦ ਕਲੀਰੇ’ (ਅਰਸ਼ਦੀਪ ਸਿੰਘ ਸੋਖੀ) ਤੇ ‘ਮੰਜ਼ਿਲ ਮਿਲ ਗਈ’ (ਮਨਪ੍ਰੀਤ ਕੌਰ ਅਲੀਸ਼ੇਰ) ਨੂੰ ਵੀ ਹੌਂਸਲਾ ਅਫ਼ਜਾਈ ਲਈ ਸਨਮਾਨ ਚਿੰਨ੍ਹ ਤੇ ਕਿਤਾਬਾਂ ਦੇ ਸੈੱਟ ਨਾਲ ਸਨਮਾਨਤ ਕੀਤਾ ਜਾਵੇਗਾ।
ਬਾਬਾ ਫਰੀਦ ਆਗਮਨ ਪੁਰਬ ਮੌਕੇ 21 ਸਤੰਬਰ ਨੂੰ ਬਾਅਦ ਦੁਪਹਿਰ 2.30 ਵਜੇ ਪੁਸਤਕ ਮੇਲੇ ਵਿੱਚ ਇਹ ਸਨਮਾਨ ਦਿੱਤਾ ਜਾਵੇਗਾ। ਆਲਮੀ ਪੰਜਾਬੀ ਅਦਬ ਫਾਊਂਡੇਸ਼ਨ ਦਾ ਗਠਨ ਪੰਜਾਬੀ ਸਾਹਿਤ ਨੂੰ ਹੁਲਾਰਾ ਦੇਣ ਤੇ ਆਲਮੀ ਪੱਧਰ ਦੇ ਸਾਹਿਤਕ ਸਮਾਗਮਾਂ ਦੀ ਲੜੀ ਤੋਰਨ ਦੇ ਮਕਸਦ ਨਾਲ ਕੀਤਾ ਗਿਆ ਹੈ। ਫਾਊਂਡੇਸ਼ਨ ਨੇ ਆਪਣਾ ਪਰਚਾ ‘ਮੁੱਢਲਾ ਅਹਿਦਨਾਮਾ’ ਵੀ ਜਾਰੀ ਕੀਤਾ।
DITED BY : SARA YAHA | | Last Updated : 8:25 pm 2 September 2018
